Su cherbeddu de unu computer contra s’abilidade umana: unu robot capatzu de giogare a sa murra e unu progetu de interessu iscientìficu. ‘Gavina 2121’ est su robot chi sàbadu 27 de austu at a leare parte a sa de bintitrès editziones de su campionadu regionale de murra, in Orthullè. In sa bidda ogiastrina b’ant a èssere fintzas unos cantos chircadores de sas Universidades de Casteddu e Tàtari chi ant a fàghere rilevamentos e intervistas cun sa punna de istudiare comente funtzionat sa mente umana durante sas fases de su giogu.
Gavina 2121 est unu robot a bisura de fèmina chi podet disafiare òmines e fèminas a su giogu de sa morra. Est fìgia de ‘Gavin 1.0’ un’àteru robot nàschidu dae un’esperimentu fatu in su 2010 dae su professore de informàtica Antonello Zizi in una classe de s’Istitutu superiore Giua de Casteddu. Gavina pigat dae Gavin su sistema de sos “cherbeddos” de giogu ma in prus tenet àteras fainas chi las rendent una giogadora perfeta: s’abbistesa artifitziale sua istùdiat su giogu de s’aversàriu pro costruere un’istrategia de atacu personalizada.
Si tratat de caraterìsticas chi diant pòdere èssere ùtiles fintzas pro chi est aprofundende su giogu de sa murra pro unu progetu de chirca iscientìfica. “Il gioco della morra tra scienza e cultura” est unu traballu batidu a in antis dae su dipartimentu de Pedagogia, Psicologia, Filosofia de s’Universidade de Casteddu, cun su dipartimentu de Iscièntzias Biomedicas de s’Universidade de Tàtari, su Multisensory laboratory de sa Lawrence Technological University (Istados Unidos) e s’assòtziu culturale “Sociu po su jocu de sa murra” de Orthullè .
Diversos istudiosos de custa iscuadra ant a èssere presentes sàbadu in Orthullè. Sos giogadores interessados ant a pòdere interagire cun sos chircadores chi indagant sos aspetos culturales, emotivos e cognitivos de sa murra e los agiuare a cumprèndere sos arcanos de custu giogu antigu.
A s’addòbiu at a èssere presente fintzas su sìndigu de su bidda Ennio Arba. Sa Giunta chitzo at a aviare sas pràticas pro donare sa tzitadinàntzia onorària a su robot Gavina: unu reconnoschimentu simbòlicu cara a s’amparu de su giogu de sa murra in Orthullè.
Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22
Attività realizzata col contributo della Regione Sardegna – IMPRENTAS 2021-2022. LR 22/2018, art. 22
