“So un’abogada chi at lutadu contra sos talebanos dae su 2009. Non m’apessamento prus petzi pro sa vida mea, ma pro sos tres fìgios meos chi mèritant de bìvere una vida chi non siat fata petzi de armas, mortos, abusos de sos talebanos subra de fèminas e pipios”.
Est s’apellu, collidu dae s’Oiad (Osservatòriu internatzionale abogados in perìgulu) e fatu pròpiu dae su Cussìgiu de sos abogados de Casteddu, de Latifa Sharifi, s’abogada chi lutat pro su reconnoschimentu e s’amparu de sos deretos de sas fèminas in Afganistàn.
Pro more de s’atividade sua at subidu, in sos annos, medas minetzas e como chi sos talebanos sunt torrados a sa ghia de s’Istadu arriscat sa vida in Kabul. “Non tèngio unu logu in nue andare. Bos prego de m’agiudare”, at iscritu in una lìtera afidada a sa sorre Atefa chi istat in sos Istados Unidos e chi at cumpartzidu in Facebook sos pessamentos suos. Domìniga 15 austu Latifa, chi dae annos traballat pro s’istòricu assòtziu Hawca, est istada refudada a s’aeroportu paris cun su maridu e a sos fìgios.
E como s’Osservatòriu pedit si s’abogada potzat in deretura lassare s’Afganistàn cun sa famìlia sua e otènnere s’asilu polìticu. Recherta chi immoe benit dae sos abogados de Casteddu chi cun su presidente, Aldo Luchi, sollìtzitant “s’interventu de s’Artu cummissàrio pro sa polìtica èstera de s’Unione Europea, de su Presidente de su Parlamentu europeu e de su Ministru de sos Èsteros”.
Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
