Fiat su 26 de abrile de su 1986 cando unu de sos reatores de sa tzentrale nucleare de Chernobyl, in s’ex Urss, si fiat isciopadu causende unu disacatu mannu. Sunt colados 35 annos dae cussa tragèdia chi at corpidu prus che totu sa Bielorùssia, acanta est rùidu su 70% su materiale radioativu essidu dae sa tzentrale.
In sos territòrios contaminados nche fiant 3.678 tzentros abitados, tra tzitades e biddas cun una populatzione de 2,2 milliones de abitantes. Sunt 479 sos tzentros chi sunt istados abbandonados a pustis de s’intzidente. In sas chidas e in sos meses a pustis de su disàura de Chernobyl, belle 700 mìgia persones tra vìgiles de su fogu, operajos, ingennieris, iscientziados e militares ant traballadu sena pasu pro chircare de pònnere in seguridade su territòriu, amparende no isceti su paisu issoro, ma fintzas s’Europa.
Sa populatzione de in cue est patente galu oe sas cunsighèntzias de cusss’intzidente. Sas patologias dèpidas a su cuntatu cun s’ambiente radioativu o a sos màndigos luados andant dae sos tumores a sas leutzemias, a sas maladias de su sàmbene. In prusm pro more de sas defensas immunitàrias prus bàscias e de sa crèschida prus lestras de sas tzèllulas, sos pipios sunt sos prus corfidos dae sos efetos de sas radiatziones.
Foto de repertoriu (2006): pipios acasagiados in Sardigna
Meda sunt istados sos chi ant chistidu chentinas de mìgias de pipios bielorussos pro more de lis cambiare àrea pro unu bellu pagu de tempus. S’Itàlia nd’at acasagiadu prus de sa metade e in Sardigna puru mìgias de famìlias sardas ant dadu una tèndida de manu istantargiende movimentu de solidariedade chi sighit galu oe, mancari su Covid-19 apat firmadu su programma dae su mese de martzu 2020 a oe. Sas famìlias sardas podent collire is pipios in su mese de Nadale, opuru in s’istade dae unu a tres meses. S’ìsula nostra podet dare a custos pitzinnos sa cosa prus importante chi tenet, est a nàrrere s’ambiente suo: s’àrea, su sole e mare, beras meighinas contra sas radiatziones.
Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
