Un’acòrdiu pro ismanniare sa produtzione de microalgas, comente s’alga Spirulina, in Sardigna chi podent èssere impreadas in meda atividades. Est istadu firmadu, in is dies colados, dae su Crs4, tzentru de chirca de su Parcu tecnològicu de Pula, e dae sa Tolo Green, sotziedade chi traballat in su campu de s’energia sustenìbile.
Su patu previdet s’isperimentatzione de tècnicas de coltivu de microalgas comente sa Dunaliella, Haematococcus e Spirulina. S’atividade, in prus, at a èssere presente dae su primu de santugaine 2021 in su Padiglione Italia a s’Expo de Dubai. Su Crs4 s’at a ocupare de crèschere sa produtzione de spirulina de s’impiantu produtivu de Arborea e de sighire s’isperimentatzione de tècnicas de coltivu innovativas fintzas in ausèntzia de gravidade chi ant a pòdere èssere impreadas in missiones pro s’esploratzione de s’Ispàtziu e in custu tretu sa Sardigna dae una pariga de annos est aprontende meda progetos, batidos a in antis dae su Dass (Distretu aerospatziale sardu) e dae is duas Universidade de Casteddu e Tàtari.
Como s’alga spirulina est cunsiderada in totu su mundu a sa base de medas màndigos de su benidore pro ite est meda energètica, e podet batire puru benefìtzios pro sa salude e in su campu de is cosmèticos. “Sa collaboratzione cun Tolo Green – sutalìniat Giacomo Cao, amministradore ùnicu de su Crs4 – s’aberit a iscenàrios natzionales e internatzionales pro custu est unu fatu de importu pro s’ìsula nostra”.
“Tolo Green est presente in Sardigna dae deghe annos, ocupende-si de fotovoltàicu e produtos biològicos comente is microalgas – ispiegat Gilberto Gabrielli, fundadore de sa sotziedade – s’atòbiu cun su Crs4 nos donat s’oportunidade de sighire a isvilupare sa chirca in una de is chimbe zonas de su mundu contadas pro sa longevidade”.
Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
Cummenta