Lollobe, una prenda pitica chi balet

Su biddatzolu de Lollobe diat pòdere intrare in s’elencu de sos burgos prus bellos de s’Itàlia. Est sa punna de su Comunu de Nùgoro chi at aprovadu una delìbera pro dda candidare in s’assòtziu de ‘I borghi più belli d’Italia’. Sa dimanda immoe at a èssere valutada dae unu comitadu iscientìficu.

Lollobe, connota in italianu comente Lollove, in su 1950 teniat pagu prus o mancu 400 abitantes mentras immoe sunt una bintina. Sa bidda faghet parte de su territòriu de Nùgoro: istat a 15 chilòmetros dae sa tzitade e paret abbarrada firma in su tempus. Galu cunservat s’istrutura medievale e sas formas de sos burgos rurales prus antigos fatos dae domos piticas fraigadas a pedra e terra. In mesu a sa bidda b’est sa cresia in istile gòticu de sa Madalena chi est inoghe dae su de deghe-chimbe sèculu.

“Sa promotzione de s’istòria nostra e de s’ambiente nostru – narat su sìndigu Andrea Soddu – est fundamentale. Lollobe, comente su monte Ortobene o s’ex Artillieria, est tra sos logos subra de cales semus investende e puntamus pro garantire s’isvilupu econòmicu, sotziale e culturale de sa tzitade”.

S’assòtziu “I borghi più belli d’Italia” est istadu fundadu in su 2001 cun s’obietivu de avalorare su patrimòniu de istòria, arte, cultura, ambiente e traditziones presente in sos tzentros piticos de s’Itàlia. Su mannu de custas biddas a s’ispissu abbarrat a foras dae sos biàgios de sos turistas e, custa est s’idea de sos promotores, isceti gràtzias a sa promotzione de custos tzentros s’at a pòdere gherrare contra su spopolamentu e su degradu de custos logos. In Sardigna sos burgos giai a intro de s’assòtziu sunt sete: Atzara, Bosa, Carluforti (U Pàize), Sa Madalena, Pasada e Sàdili.


Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22 Attività realizzata col contributo della Regione Sardegna – IMPRENTAS 2021-2022. LR 22/2018, art. 22

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.

Iscrie pro primu

Cummenta

Sa mail non at a èssere publicada


*