In is bestiris de Manuela Murgia no ant agatadu su Dna de s’ùnicu indagadu pro sa morte sua. Sa positzione de Enrico Astero, amorado de tando de sa pitzoca, bessit rafortzada a pustis de s’intzidente probatoriu.
A Manuela Murgia dd’aiant agatada morta su chimbe de freàrgiu de su 1995 in su canyon de Tuvixeddu in Casteddu. Teniat deghe-ses annos e tando is esàmenes fatos dae is espertos de sa Procura aiant marcadu sa morte comente suitzìdiu. A pustis de trinta annos sa magistradura at torradu a aberrere s’indàgine pro sa de tres bortas (is primas dd’aiant archiviadas) gràtzias puru a sa richiesta de is parentes de sa fèmina.
Finas a como s’ùnicu indagadu fiat Astero però s’anàlisi de su Dna abarradu in is bestiris cunservados pro totu custu tempus at cunfirmadu chi su de s’òmine non ddoe at.
Astero in su 1995 teniat 24 annos, prus bortas ocannu at naradu chi isse non nch’intraiat nudda cun sa morte de Manuela pro ite sa die de s’iscumparsa fiat faghende àteru, fiat in un’àteru logu e tenet finas testimòngios. “Est acabende unu bisu lègiu” at naradu eris a s’imprenta a sa fine de s’udientzia.
Sa morte de sa pitzoca però abarrat imboligada in su misteru pro ite is esàmenes fatos dae su Ris de Casteddu no ant aclaradu de chie est su Dna chi a onnia manera est presente in is pilos e in is abitos de Manuela Murgia. Duncas su pùblicu ministero at a detzìdere si archiviare o puru aprufundire pro cumprendere comente est morta Manuela Murgia.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
