Dae ghennàrgiu Brexit at a èssere realidade. Ma s’acòrdiu istòricu fatu a s’ùrtimu momentu dae s’Unione de s’Europa cun s’Inghilterra no est pràghidu a is prus de milli impresas sardas chi esportant produtos a sa Bretagna Manna e immoe arriscant una frenada in is afares issoro.
Is ùrtimos datos faeddant de prus de 50 milliones de èuros ònnia annu de produtos sardos piatzados in Inghilterra, Galles, Iscòtzia e Irlanda de su Nord. Ite at a cambiare pro chie at a bòlere bèndere benes e servìtzios in su Regnu Unidu? Ddoe at a tènnere trèulos o fatzilitatziones? Ite at a capitare a su cummèrtziu in lìnia? Sunt custos is interrogativos collidos dae Confartigianato imprese Sardegna in custas ùrtimas chidas.
“Galu nemos connoschet s’acòrdiu chi at a regulare is raportos cummertziales tra Regnu Unidu e s’UE, e custa cosa est pesende medas pensamentos — afirmat Antonio Matzutzi, presidente de Confartigianato – fintzas pro ite abetaìamus s’istitutzione de un’àrea de lìberu iscàmbiu cun règulas armonizadas, ma de custu, pro s’ora, nemos nde faeddat. Mescamente tocat a istare atentos si su Regnu Unidu detzidet de cungiare acòrdios bilaterales cun paisos comente is Istados Unidos”.
De su matessi argumentu: Brexit prus serente. Cales cunsighèntzias pro s’economia sarda?
Difatis, dae su primu ghennàrgiu, alimentares, bestimenta, arredamentos, machinàrios ma fintzas servìtzios a is impresas ant a dèpere, a pustis de medas annos, passare dae una dogana e fàghere controllos e presentare tzertificatziones e documentos. De cunsighèntzia, is relatziones cummertziales tra Regnu Unidu e Europa ant a èssere abrandadas meda.
Duncas no at a èssere fàtzile pro is aziendas, e immoe tocat a predispònnere addòbios e video-cunferèntzias pro preparare is imprendidores. Is pensamentos printzipales de is imprendidores sunt duos: s’aplicatzione eventuale de Iva e s’aumentu de sa burocratzia. “Però sa timoria prus manna est cudda de torrare in dae segus de deghe annos – narat galu su presidente de Confartigianato Imprese Sardegna – colende de una situatzione de tzirculatzione lìbera de mertzes e traballadores a una fratura profunda, fata de serrada de is mercados e riprìstinu de is tarifas betzas. Ma depimus crèere chi s’Itàlia e s’Europa ant a èssere a tretu de agatare is modalidades netzessàrias pro gestire is recaimentos de cantu s’at a pòdere averguare”.
Brexit prus serente. Cales cunsighèntzias pro s’economia sarda?
Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
