Una gherra a astesu meda e una fàbrica in Sardigna, tra Igrèsias e Domusnoas, e ancora unu comitadu de assòtzios territoriales, natzionales e internatzionales chi gherrant pro sa ricunversione de s’istabilimentu, pro sa paghe e un’isvilupu diferente. Custa sa punna de su Comitato Riconversione Rwm, nàschidu su 15 de maju 2017 pro promòvere sa ricunversione a s’economia tzivile de totus is logos in ue si produent armamentos e munitziones, comente is bombas Mk82 chi s’Aràbia Saudita at impreadu pro is bombardamentos in Yemen.
Ma in custas chidas, pro more de sa proibitzione de esportare armas cara a paisos in gherra, sa fàbrica at annuntziadu su firmu produtivu e pedit a su guvernu de dd’agiudare a bìnchere sa crisi. Comente a semper a nde pagare is cunseguèntzias sunt is aneddos prus dèbiles de sa cadena: 80 postos de traballu giai pèrdidos e àteros 90 in càscia integratzione.
Tando su comitadu at detzìdidu de fàghere una petitzione in su situ change.org, imbiende•dda a su primu ministru italianu Giuseppe Conte, a su ministru Luigi di Maio e a su presidente de sa Regione sarda Christian Solinas, pro pedire “chi su guvernu natzionale e regionale, is amministratziones comunales e is organizatziones sindacales non s’adduant a tutelare sa fàbbrica de sa Rwm e s’impinnent imbetzes, cunforma a is printzìpios de sa Costitutzione, a promòvere un’àterua casta de isvilupu chi avaloret is risursas de sa terra, de sa natura, de sa cultura, sena iscalabrare is àteros paisos”. Su comitadu pedit a su guvernu, in custa situatzione dìliga meda, “su coràgiu de provare a rapresentare su riscatu nostru: nemos depet èssere custrintu a prodùere armas dannàrgias e inùtiles pro limosinare postos de traballu.
