Su Comunu de Igrèsias, titulare dae unos cantos annos de progetos Sai – Sistema de Acasàgiu e Integratzione, a pustis de sa rechesta de su Ministeru de s’Internu, at donadu sa disponibilidade sua a acollire pro is persones chi ant lassadu s’Afganistàn a pustis de is acontèssidas de is ùrtimas chidas.
“Unu sèberu de solidariedade a banda de sa tzitade Nostra – at cummentadu su sìndigu Mauro Usai – chi at abertu is ghennas suas a is persones chi sunt in chirca de una vida noa a tesu de sa gherra e de sa poberesa, cun s’agiudu de cun sa cooperativa Casa Emmaus chi gestit unu progetu a posta pro s’acasàgiu de famìlias e fèminas solas e cun minores. Pro custu, donende atuatzione a su mandadu eletorale nostru e a is balores in is cales creimus, comente s’atentzione pro sos prus dèbiless, in is cales si fundat s’alleàntzia chi amministrat sa tzitade, amus espressadu totu sa disponibilidade nostra a garantire s’acasàgiu de is tzitadinos afghanos arribbados a su paisu nostru, comente is collaboradores de su contingente militare, de sa rapresentàntzia diplomàtica e de is organizatziones non guvernativas, cun is famìlias issoro”.
“Una manera pro nde garantire sa seguridade e de ddis donare s‘ocasione de comintzare una vida noa a largu de is perìgulos de sa gherra – sighit su sìndigu -cun s’ispera chi sa situatzione internatzionale potzat garantire un’assentadura de s’Afgànistan, in unu protzessu de paghe chi, sena unilateralismos, fatzat de su diàlogu su puntu a fortza suo, sena s’iscarèssere però de is conchistas otentas dae sa sotziedade afghana in is ùrtimos annos, comente sa legalidade, s’esistèntzia de un’istadu de diritu, s’amparu de is minorias e sa cunditzione feminile”.
Pro s’assessora a is Polìticas sotziales Angela Scarpa “acollire is persones chi lassant s’Afgànistan pro si fuire de sa gherra rapresentat unu gestu de grandu umanidade, chi at a permìtere de acrobare solidariedade e acasàgiu, sena trascurare sa seguridade de totus is tzitadinos de Igrèsias”.
Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
Cummenta