Est nàschidu sàbadu 22 maju s’assòtziu “Warfree – retza de imprendidores, butegheris e traballadores pro sa Paghe e sa Transitzione eco-lògica”. Sa primu tapa de su percursu at bidu sa collaboratzione tra imprendidores, su comitadu pro sa ricunversione de sa Rwm, Aps Link – Ligàmines de fraternidade, Federatzione de is Crèsias evangèlicas in Itàlia, Crèsia valdesa, Crèsia Evangèlica de su Baden, s’Universidade de Casteddu e Banca Etica. Sunt 32, tra rapresentantes de is impresas, professionistas e persones fìsicas, is primos membros intrados a fàghere parte de s’assòtziu.
S’assòtziu promovet sa solidariedade in su Sulcis-Iglesiente e in Sardigna. Si tratat de una retza de agiudu tra impresas, entes e privados pro afortigare sa calidade de s’oferta de su territòriu, favorire sa nàschida de impresas e traballos sustenìbiles. Unu trastu a disponimentu de is assotziados est su ‘smart desk’, un’isportellu de professionistas chi ant a suportare is aziendas in totu is fases de sa vida issoro, oferende consulèntzia de mercadu, publitzidade, finantziamentos e comunicatzione.
“Sa costitutzione de s’assòtziu est unu passu de importu conca a una Sardigna chi bivat de paghe, pro mesu de un’economia sustenìbile e ètica, sena gherra. Est isvilupende∙si semper de prus un’alternativa a s’indùstria de produtzione de armamentos. Is impresas, is professionistas e totu is assotziados disìgiant èssere autores de unu protzessu de cambiamentu. Una cultura econòmica noa chi pòngiat a su tzentru su benèssere de s’umanidade e de s’ambiente, e non petzi su profetu” narat una nota de imprenta.
Is initziativas ant a èssere postas in sa prataforma ‘Marketplace Warfree’, una pitica Amazon alternativa gestida dae sa cooperativa de giòvanos, acanta ogna fornidore de produtos e servìtzios tzertificadu dae sa Rete at a tènnere su butega sua in su mercadu globale; sa registratzione de su màrchiu colletivu europeu “Warfree”.
Pro nde ischire de prus: https://www.warfree.it/
Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
