Règulas noas pro parare fronte a su Coronavirus in Itàlia. Dae su 6 de chenàbura de santugaine ant a imbucare àteras mesuras, diferentes a segunda de is Regiones. Su paisu est istadu divisu in tres partes: una zona ruja, una colore de arantzu e un’àtera groga. Sa Sardigna apartenet a cust’ùrtima zona, cussa acanta is casos de condidura de su virus sunt prus bàscios e s’arriscu est minore.
Pro is sardos duncas is proibitziones ant a èssere prus pagu graes. Dae is deghe de note finas a is chimbe de mangianu non si podet essire dae domo, francu pro motivos de bisòngiu, traballu, istùdiu o salude. Abarrant serrados teatros, museos, mustras, tzìnemas, palestras e piscinas. Abertos is tzentros isportivos. Tancados puru is tzentros cummertziales in is dies festivas e in sa die a in antis de is festivos, però abarrant abertos alimentares, istancos, e edìcolas internas.
In is iscolas superiores is letziones ant a èssere fatas in lìnia, pro is elementares e is mèdias imbetzes non càmbiat nudda. Cungiadas is universidades.
Tzilleris e ristorantes ant a dèpere abbassare is serrandas semper a is ses de merie, ma però ant pòdere traballare cun su servìtziu de asportu a domitzìliu finas a is deghe de sa note. Suspesas is atividades de bingo, machinetas pro su giogu de azardu e salas de giogu.
Is matessi règulas de sa Sardigna balent fintzas pro Abrutzu, Basilicata, Campània, Emìlia-Romagna, Friuli Venètzia Giùlia, Làtziu, Ligùria, Molise, Marche, Toscana, Ùmbria, Vènetu e is Provìntzias de Trento e Boltzanu.
