Àrbores rùidos a terra, brusiados dae su fogu chi in s’istiu de su 2021 at bisestradu is padentes de su Montiferru como divenint isculturas e fotografias. Faghent parte de su progetu de s’artista aristanesu Michele Ardu chi traballat tra sa Sardigna e Londra, pruschetotu cun s’arte fotogràfica, e chi a pustis de su disacatu mannu de s’annu coladu at detzisu de torrare in sa terra sua pro documentare su chi est sutzèdidu in su Montiferru.
Caminende in is padentes tristos e nieddos de sa bidda de Cùllieri, Ardu at seberadu truncos de linna piticos e ddos at torrados a faghere bìvere cun s’arte de s’iscultura: algunos sunt istados pintados cun su colore de s’oro, àteros sunt abarrados nieddos comente ddos at agatados. Dae custu traballu est nàschida sa mustra ‘Aurum urens’ chi dae oe si podet bìdere in sa tzitade de Siena (Magazzini del Sale) finas a su deghe de trìulas: in mustra nche sunt 15 fotografias e 30 isculturas.
“S’installatzione in mustra contat sa fortza de sa natura, su dramma de sa distrutzione, sa dignidade de su chertu pro sa vida e sa lughe de sa rinàschida” iscriet Ardu in sa presentada de su progetu. “Is fogos tenent efetos chi bisestrant sa vida in sa terra. Is datos narant chi isceti in su 2021, in su mundu ant brusiados prus de 2 milliones de ètaros de padentes e forestas, in prus 30 milliardos de metros cuadros de natura e vida sunt istados distrùidos dae sas framas. A s’ispissu paret chi sutzedere sena unu motivu, àteras bias pro distratzione o forsis pro sa summa de curpas diferentes”.
Su progetu Aurum Urens de Michele Ardu sutalìniat su balore de sa natura distrùida dae sas framas e su chi abarrat a pustis de su fogu. Unu traballu chi tenet s’obietivu de pensare subra de custu tema a livellu globale, sensibilitzare s’opinione pùblica e sustentare sa forestatzione.
Dae s’archìviu: S’inferru in sa terra
Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22 Attività realizzata col contributo della Regione Sardegna – IMPRENTAS 2021-2022. LR 22/2018, art. 22
