Una regorta de firmas pro pedire unu referendum chi dimandat a sos italianos si bolent sa cannabis legale in su paisu issoro. Est cumentzada in custas dies sa campagna ‘Cannabis Legale’ chi si podet agatare in lìnia in su giassu www.referendumcannabis.it.
Sa punna de su referendum est sa de cantzellare su reatu de coltivatzione de sa marijuana e de nche bogare fintzas sas penas detentivas ligadas a s’impreu de sa cannabis, gasi comente su retiru de sa patente de ghia.
Pro aderire a s’initziativa si podet firmare in lìnia cun sa firma digitale, duncas impreende su Spid opuru unu dispositivu ‘smart card’, una crae Usb o sa ‘firma digitale remota’. Sa dimanda de su referendum pertocat su decretu de su presidente de sa Repùblica nùmeru 9 de su 9 de santugaine e bolet abrogare partes de sos artìculos 73 comma 1, 73 comma 4, 75 lìtera A.
Sa proposta de su referendum est arribada dae su partidu Radicali Italiani e pro èssere bàlida depet regòllere 500 mìgias firmas intro sa fine de cabudanni. Sa legalizatzione de sa cannabis diat pòdere serbire pro nche pesare dinari a is màfias, ismanniare sas intradas de s’Istadu e permìtere a sos malàidos de impreare sa cannabis pro sas terapias. Finas a oe sa proibitzione no at batidu resurtados de importu, comente si podet cumprèndere leghende sos giornales locales: ogni die s’allegat de giòvanos arrestados mancari pro ite agatados cun carchi grammu de cannabis. In prus, cun sa cannabis legale su sistema de sa giustìtzia puru diat pòdere tènnere vantàgios.
In su 2018 in Sardigna fiat nàschidu unu comitadu pro àteros duos referendum chi pertocaiant su matessi argumentu. Unu pro sa legalizatzione de sa cannabis ricreativa e un’àteru pro sa produtzione regionale de sa cannabis terapèutica. Ambos duos non fiant istados ammìtidos dae s’Ufìtziu tzentrale regionale.
Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
