Sa Sardigna est pronta: su 18 de maju ant a torrare a abèrrere butegas, tzilleris, ristorantes e traballos chi oferint servìtzios a sa persona. Pro s’ora ant a abarrare a foras de sa lista tzìnemas, teatros, cuntzertos, palestras e pischinas, pro is cales su guvernu retenet chi s’arriscu siat galu artu.
Però, bidu ca ant a abèrrere butegas e tzilleris, s’est chistionadu de sa possibilidade de nde bogare su vìnculu chi permitit de s’ispostare isceti pro bisitare is parentes. Ma custa est un’ipòtesi ebbia chi est essida a pìgiu in s’arresonada tra guvernu e majoria. A pitzu de sa chistione non ddoe at acòrdiu, e calicunu ministru est insistende pro more chi su vìnculu abarret.
Immoe, cun s’arribu de s’istade, est de cumprèndere comente si podet gestire s’atzessu a is marinas lìberas de s’Ìsula. Su presidente Solinas isperat de pòdere torrare a abèrrere a is turistas a pustis de su 15 de mese de làmpadas. “Semus aprontende unu sistema de controllu adeguadu” at naradu a sa trasmissione radiofònica “Un giorno da pecora” de Radio1.
S’idea est duncas cussa de impreare unu passaportu sanitàriu, chi diat rechèrrere sa tzertificatzione de negatividade pro mèdiu de unu tampone fatu non prus de sete dies a in antis de sa partèntzia, e cun is proas lestras de fàghere in is iscalos.
Una cosa est crara a totus: su disìgiu de torrare a sa normalidade est mannu meda. A pustis de duos meses de cuarantena, est divenende semper prus complicadu a poderare is persones iserradas in domo. E tando est inevitàbile a allascare s’istrinta.
Ma dotores, infermieris e is chi traballant ònnia die contra su virus ponent a sa lerta pro s’arriscu de torrare tropu de presse a sa normalidade, ismentighende•si chi s’emergèntzia no est galu acabada. “Sa netzessidade de torrare a partire est legìtima, ma pro abarrare in sa ‘Fase 2’ est pretzisu a sighire is règulas. S’arriscu de torrare a serrare totu est mannu meda”.
L.M.
