A trinta annos dae sa nàschida totu sa mùsica de is Kenze Neke in lìnia

Sunt colados belle trinta annos dae sa nàschida de is Kenze Neke, unu de is grupos musicales prus importantes chi sa Sardigna podet ammentare. Pro festare custa data is Kenze Neke torrant, gràtzias a s’eticheta discogràfica indipendente Nois, in totus is prataformas musicales de streaming a cumentzare dae Spotify, finas a arribbare a Apple e Amazon Music.

Una sienda musicale de importu culturale, sotziale e polìticu, abarradas pro medas annos custoida e disponìbile isceti in is versiones imprentadas, ma chi in pagu prus de deghe annos de fainas est renèssida a furriare is cànones musicales e culturales de medas giòvanos sardos e no, traghende sa Sardigna a una notoriedade musicale chi andat prus addae de s’ìsula matessi, ispantosa meda pro cussos tempos a caddu tra s’agabbu de is annos ’80 e is primos annos ’90.

Printzipiende dae chenàbura su 26 de làmpadas, ònnia 15 dies sa discografia intrea de is Kenze Neke at a pòdere èssere difùndida e iscurtada fintzas in manera “lìcuida” pro mèdiu de su streaming, trastu de difusione divenidu sa normalidade pro is impitadores e apassionados de totu su mundu.

Sa primu essida de custa operatzione longa est su primu demo-tape de su grupu, intituladu “Chin Sas Armas O Chin Sas Rosas”. Su discu, essidu in is primos meses de su 1990, cuntenet 9 cantzones tra is cales s’omònima “Kenze Neke”, iscrita e dedicada a Michele Schirru, fusiladu in su 1931 dae unu plotone de fascistas sardos, cun s’acusa de àere manifestadu s’intentzione de ochìere a Benito Mussolini. “Amerikanos, A Balla Chi Bos Bokene” est imbetze una cantzone de protesta contra is bases militares americanas in Sardigna. “Bette Monkey” est pigada in prèstidu dae “Monkey Man” de is The Specials (formatzione istòrica britànnica de mùsica ska).

Sos petzos de su discu:

Kenze Neke – Chin Sas Armas O Chin Sas Rosas / 1990 (màchina-produtzione/KN)

  • Pilinzola
  • Zente
  • Tempus Pertu
  • Chin Sas Armas O Chin Sas Rosas
  • Bette Monkey
  • Do You Know What You Do?
  • Kenze Neke
  • Prusu A Fundu
  • Amerikanos A Balla Chi Bos Bokene

In su discu ant sonadu:

Renzo Saporito – boghe e chiterra

Tonos Carta – bassu

Luciano Sezzi – sassòfonu

Sandro Apo impreadu – bateria

L. M

Ascurta in Spotify:

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.

Iscrie pro primu

Cummenta

Sa mail non at a èssere publicada


*