Est essidu su documentàriu ‘The sardinian factory of death‘ (Sa fàbrica sarda de sa morte), de sa regista, iscritora e antropòloga sardu-australiana Lisa Camillo, chi bolet sensibilitzare sa gente e prus che totu sos giòvanos a defèndere sa terra issoro.
Su film, disponìbile in lìnia in Al Jazeera pro sa sèrie Close Up, contat s’istòria de una truma de persones de Igrèsias chi lutant pro riconvertire sa fàbrica de sa sotzietade tedesca Rwm pro dda trasformare sa regione issoro in una “terra sana”, cun unu màrchiu de calidade: War_Free, lìberos dae sa gherra.
Lisa Camillo, autora de su libru ‘Una ferita italiana’ e de su documentàriu longumetràgiu ‘Balentes’, sutalìniat sa resilièntzia de unos cantos sardos balentiosos chi punnant a una reconversione lenta de sa fàbrica de bombas in un’indùstria chi “amparat sos traballadores e respetat s’ambiente, fraighende unu tessutu econòmicu prus sustenìbile e adatu a su territòriu issoro”.
Su comitadu pro ricunvertire sa Rwm: “Un’alternativa a custa fàbrica de gherra est possìbile”
“Sos sardos – at naradu sa regista – si diant dèpere opònnere a custu istragu, diant dèpere gherrare pro si torrare a impossessare de sa terra issoro, diant dèpere nàrrere bastat! Deo dd’apo fatu e m’ant fintzas minetzadu, ma non mi so firmada e non m’apo a firmare mai. Si chergiamus chircare de cambiare calicuna cosa, prima de totu nos devimus informare nois e informare sos fìgios nostros chi sunt sos chi prus de totus pagant e ant a pagare su prètziu de su luamentu ambientalechi càusat maladias, chi impedit un’isvilupu sanu”.
War free, un’assòtziu pro un’economia sarda sustenìbile e de paghe
Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22 Attività realizzata col contributo della Regione Sardegna – IMPRENTAS 2021-2022. LR 22/2018, art. 22
